無啦啦, 扮Blogger?

今時今日，寫Blog 已經無咩特別，普遍程度同你去打籃球做gym 差唔多。所以，小弟絕對唔係要扮潮人。之不過，見到網上以及身邊有啲朋友個Blog 整到美輪美奐，可以講吓工作、時事、甚至亂噏廿四，又幾好噃！成日都心思思，想自己整返個。幾年都未郁手，主因係「懶」字，講真呢樣嘢又冇逼切需要，咪一路拖拖拖.........

直到最近係<<主場新聞>>讀到阿里巴巴創辦人馬雲插手中國金融領域，餘額寶、小微企借貸，一種山雨欲來感覺湧上心頭，令小弟不得不寫下來。或者，我身處一個革命中，而結果會令銀行業翻天覆地。當然，小弟未夠班去做full report，不過作為一個小職員，紀錄當中花絮、趣聞，我諗都ok 啩？

當年畢業有份工都已經好彩，能加入一家本地商業銀行，即係有分行俾你入去排隊、會cold call 叫你 [買保險／投資／借錢] 個啲普通銀行 (嗱！唔係普羅大眾趨之若鶩嘅投資銀行，有乜分別遲吓再講，想睇投行內幕建議立刻離開本Blog)。小弟隸屬「企業銀行部」(有啲叫「批發銀行部」，即係 corporate banking/wholesale banking，間間銀行唔同名)，我哋嘅客戶係一間間公司，而唔係你同事Peter Chan 或鄰居李師奶。

小弟係客戶經理 (Relationship Manager 行內簡稱 RM)，負責「湊」一班「中型企業」(即係Mid-cap/Middle Market)，簡單講唔會係大到和黃、新鴻基、NIKE 個啲無人不識，又未細到你樓下個啲辦館士多茶餐廳，通常都係貿易公司，有一百幾十個員工，又或者係國內有一至數間廠做生產，不過老闆係香港人，headquarter 係香港。總之，唔大唔細，乜行業都有。

工作範圍其實好廣泛，客戶有關銀行事宜都會揾你。個客錢多就sell investment，無錢就傾融資 (借錢)，近年低息所以存款基本上係蝕錢，搶deposit 係無用。個別企業會做對沖(hedging)，外匯(Foreign Exchange, FX)、利率(Interest Rate Swap, IRS)、商品(Commodity)都有，結構產品（Structured Producst, 銀行好好賺）都唔少，類似2008年蝕到中信泰富(267) 入肉個啲就係其中之一。仲有就係一啲客戶分析工作，個客要借錢就寫Credit Proposal，以及之後一大堆監管機構要求銀行對客戶所進行盡職調查(due diligence)、日常銀行內部監控(monitoring)，倘若客戶有乜頭暈身㷫投訴不滿，幸運的話就俾上司訓斥，大鑊就等俾人兜，或者自行了斷 (遞信)......

講咗咁耐，都未提到點解馬雲插手金融業會令到小弟有衝動去開Blog 獻醜。話說自小弟入行銀行運作基本上係無乜改變過，最大變動都係日趨嚴格嘅監管。盈利模式、風險管理等都只有小改，基礎理念實際操作都差不多。主因就係欠缺新競爭對手，反正大家都係咁做，做咗咁耐，無謂改啦！致於點解無new entrants，因為愈來愈多監管，有興趣嘅朋友可以上金管局網頁參考參考。

馬雲精明之處在於以網上交易平台身分提供銀行服務，繞過重重監管大幅降低合規成本(compliance cost)。而且所有交收網上進行，省卻大量人力資源分行開銷，以上成本優勢已經可以將中小型銀行殺過遍甲不留。

小微企貸款更係屈機之作。一直以來，中小企業(SME, Small-Medium Enterprise) 都係「雞肋」，客戶多，卻又風險高。銀行對企業客戶風險評估不外乎以下幾點：(1) 行業前景industry analysis (2) 營運模式business operating (3) 財務分析financial analysis (4) 過往表現account conduct。(1) 同(2) 基本上有客講無你講，同布行老闆講針織梭織、缸染印染等同自暴其短，你最多揾同業比較一下。第(4) 點新客不適用，現有客戶到conduct 出問題已經太遲，就算救到都搞到你一頭煙。財務分析比較客觀，起碼盤數有核數師睇過，問題係lagging。上市公司好啲，至少半年有盤數過目，年結／半年結後兩三個月就俾到銀行。SME 就一年做一次，年結後半年出到盤draft audit 都叫早。加上主要為報稅，通常只係賺好少，而且SME 老闆「公」「私」不分，啲數可以亂到無乜參考價值。

馬雲點「屈」呢？就係透過交易平台數據。

舉例，有間SME 整咗件新產品出來，極受市場歡迎越賣越有，走去揾銀行借錢做多啲生意。一般會叫個老闆攞盤數望望。剛才講過，SME 啲數要成年先見到，到佢俾到盤數個市都唔同晒啦！產品再受歡迎銀行都要有根有據，如銷數額，先可以放錢出街。

行文至此相信不少讀者已經明白馬雲厲害之處。試想一下，新產品經阿里巴巴、天貓或淘寶出售，貨款由支付寶交收。銀行要一年先有嘅資料，馬雲係real-time。當然你可以話得個銷售數字，唔知道成本又點知間公司賺定蝕。不過你要明白，銀行借款係用「錢」去還，唔係用「盈利」，而銷售額正正係不折不扣--- cash！如果間SME 經阿里巴巴買料做貨，結局就係成條supply chain 睇晒，馬生連件產品賺幾多都一清二楚。

從風險管理角度，倘若一間公司件皇牌產品滯銷，銀行一年之後先發覺，人家拿當月交易額比對往年數字就一目了然，你話邊個走得快？馬雲仲搞埋速遞菜烏網絡，他日商品交收錢銀清算盡收其下。冇錢還？唔緊要，啲貨仲係佢手。銀行將個客清盤，上到office 一般只會見到幾張吉枱，人去樓空。貨？一早搬走咗啦。

要argue 的話，個客賣完貨啲錢都要入銀行，銀行點會無數據。不過，你認為一般公司只用一間銀行？再者，銀行只係見到有錢入來，來自邊度根本無從稽考。相反透過交易平台，買家資料(年齡／地區／職業)、銷貨速度、退貨紀錄等等垂手可得。銀行手持資訊「質」與「量」根本冇得比。更恐怖係，阿里巴巴係國內根本無對手，接近壟斷網上交易平台。

誠然，網上銷售此刻仍未趕過行街shopping，亦唔係所有公司都做online sales。不過，增長速度絕對不容忽視，小弟家中太座已甚少逛超市，日用品多數網上購買。當越來越多商戶用網上平台交易，銀行要面對嘅競爭，除咗同行，仲有跨行代表。

小弟相信，科技帶來銀行業革命剛剛開始，結果未知。不過，值得開個Blog 做 record。