我想做銀行？

小弟不時係討論區見到有剛畢業或就快畢業學生表示有興趣投身銀行業發展個人事業，並垂詢相關 [資歷／能力／專業考試] 要求，甚至有人想為轉做銀行作準備。

以小弟職場經驗當然未夠班做career advice，不過係銀行時日不淺，寫少少俾人參考應該都
okay 嘅。請留意小弟自入銀行以來都係「企業銀行部」，有關其他部門所述未必準確，若有同行讀到有問題之處，敬希賜教。

首先問何解要做銀行？如果你做銀行個原因係啲三姑六婆人云亦云，我勸你都係返去攝高枕頭再諗諗。人工高、福利好？Well，人工好高個啲係投行或私人銀行，而佢哋一般只為以下兩類人送上聘書 (1) 精英中嘅精英 best of the best (2) 有背景有家底有connection 幫到揾生意嘅candidate。直接啲講，閣下要到討論區揾資料及睇本Blog 亂寫一通，會係以上兩類人嘅機會係極微。

一般銀行中低層員工薪金不見得比其他行業高好多。前線銷售人員可能會高一啲，不過其他行業sales 人工花紅對比銀行絕不失禮。小弟有朋友於尖沙咀某鑽飾名店做senior sales，佢年薪同小弟爆數個幾年相差都係幾千蚊。不過小弟為跑到條數要晚晚九點放工，出去見客劈酒俾人串又要舟車勞動返大陸睇廠；佢都係九點收工，不過返十一點，而且佢坐係鋪頭歎住冷氣等客上門。

至於福利，小弟又唔見得有幾咁好？供樓利息其實同街客差唔多，有段時間街客個rate 仲好過staff plan，問你死未。Medical 同一般稍有規模企業相去不遠。不過就算你做個間公司無，走去揾保險經紀買份medical insurance 都係幾舊水一個月，又係咪真係咁重要呢？存款利率通常都係好過街客1-2%，最明顯福利咪免收大部分銀行收費。仲有無？我真係諗唔到。

唔知點解到今時今日都仲會有人同你講做銀行有job security。如果有人同你咁講，條友極可能係從上世紀七八十年代穿越而來。你重温一下過去三年裁員新聞就會明白現時銀行份工有幾「穩定」。

如果閣下非因人工福利穩定，而又對相關職位部門工作有一定認識，進而決定加入銀行，咁不妨再睇小弟亂噏。除咗個別部門如IT 等對畢業生學科上有要求外，大部分職位其實你undergraduate 讀邊科無乜所謂，反而個grade 更重要。英語水平非常重要，大部分銀行文件以英文為主，倘若做外資銀行就讀寫都要有一定水準。溝通能力要好，銀行最多嘅係人，而且分工可以好精細，做一件小事都可能牽涉幾個部門三五七個同事，得罪人多絕對唔會有運行。

至於個啲甚麼保險投資牌，愚見以為係唔需要未入行就預先報考。銀行唔會因為你有個牌去請你，written test 或 interview 表現更為重要。如果工作需要個牌，銀行會俾時間你去準備，個別銀行仲會有training。考試費用正常有得claim，你咁抵得諗自己哽銀行都唔會多謝你。所以，有時間的話閱讀SCMP 會更有用。

金融海嘯前，不少年輕人以為金融才俊出入中環好型。你試試烈日當空三十幾度著住套西裝係翠華門口等位食lunch，其實都幾憨ｘ。海嘯後銀行中人變成過街老鼠，吸引力大減。仲好，唔會荼毒啲年輕人走去做銀行咁無出色。

時至今日，銀行工係薪金以及社會上吸引力已大不如前。行業前景不穩，唔做中國相關業務就等執笠，做太多又驚輸得仲多。監管日重壓力大增，員工怨氣越來越多。小弟開Blog 其中一個原因係想呻吓好多不知所謂嘅事。

我講到咁，如果你都係想加入銀行，容我最後一句：「回頭是岸呀！」。嗱！勸就勸咗，他日後悔唔好找「小」職員晦氣。