利益衝突

波波囤地事件越演越烈，陳局長再三交代，市民卻越來越火滾！各大小媒體對事件已有廣泛報導評論，小職員不贅。不過作為銀行中人，如何看待事件不妨略說。

成單嘢四個字講完 --- 利益衝突 conflict of interest。呢幾隻字基本上每位銀行職員入行時都會透過不同渠道如員工手冊、銀行政策文件、工作指引等等不停咁講完又講。一般兩三年要refresh 吓，做啲白痴 on-line test，不論你幾高級都要做。

目的好簡單，若員工於日常職務或工作範疇發現與自身利益相關，必須呈報上司以及避免參與其中。原因係希望員工 free from bias，例如一個員工嘅大伯走來銀行借錢，即使照足程序、完全符合銀行一貫政策指引，個位員工都唔會負責處理或審批，連問吓都唔得！小職員不時需要列席 credit committee (授信委員會)，開得會嘅只有高層，負責審批大額授信，至少過億先要開會。有一次，個agenda 最尾係要傾一單credit card，limit 係十二萬。當時小職員諗到核爆都唔明點解要拎上會傾。答案：申請人係CFO 老婆。傾個時CFO 要避席離開會議室。

你絕對會認為咁做係白痴兼多餘，相信當日開會嘅都係咁諗。講真，又點會唔批吖，而事實上整個表決CFO 離開會議室五秒後已經搞掂。不過，成班高層明知咁無聊都硬係要做台戲過吓場，係份minute 簽名作實，就明白銀行對conflict of interest 有幾重視。

小職員工作上不時接觸企業敏感資料，如財務報告、併購消息、工程項目進度、商業協議細則等等。入職前需要申報自身、配偶及直系親屬所有投資戶口及持貨，之後所有買賣一概需要預先申請。家人(包括父母子女兄弟姊妹) 於所屬銀行一切借貸同樣要定期上報。

小職員何等低級，尚且有如斯要求。是但揾個銀行職員問波波單嘢，盲嘅都知有conflict 啦！局長，等到被人踢爆先回應，呢啲叫斷正。認錯啦！

至於點處理 (定係「處置」呢？) 陳局長，well 呢個問題就有勞特首，話晒你請佢返來。不過，至少唔應該再負責有關東北發展計劃啦，係咪？

至於佢唔做東北，仲有乜做？妖！叫咗你去問振英啦！